D'Adolphe Delmee (1820-1891)

Leray l'a dit dins les guerr's de la France,
Quand l'Caporal s'apprèteot à buquer,
S'ortournant su s'n'officier d'ordonnance
"Dis deonc, l'ami, c'qu'on peut bêteot qu'mincher?"
No n'aid'-de-camp s'ertourneot tout d'ein traque,
R'weitieot au leon et puis diseot comm' cha
"Sa Majesté, on peut donner l'attaque,
On peut qu'mincher, les Tournaisiens sont là!"
On peut qu'mincher, les Tournaisiens sont là,
On peut qu'mincher, les Tournaisiens sont là!
Tralala la la la la lala lala
La lalalalala !

2.

D'aussi longtemps que l'mémoire l'permette,
Cha 'té comm' cha, dins la guerr', dins la paix
D'Jérusalem, ti-est-c' qui feonche les ferniètes
Tous les prumiers, ch'est deux infants d'Tournai.
Et Godefroid, tout in suivant leu trache
D'ein veox d'taureau, crieot à ses soldats
"On peut passer, pour tertouss i-a de l'plache,
On peut rintrer, les Tournaisiens sont là
On peut rintrer, les Tournaisiens sont là
On peut rintrer, les Tournaisiens sont là
Tralala la la la la lala lala
La lalalalala !

3.

Ein peu pus tard, quand les rois, heomm's de tiête,
F'seottent tuer nos pèr's pour des brins d'tchiens,
Etant su l'point d'attraper ein doguette
I v'neottent querr' l'appui des Tournaisiens
Le Roi Louis connisseot bin cell' sorte,
Car i diseot, in s'mettant su s'matl'as
"Je r'pose en paix, ne fermez pas la porte,
J'peux m'endormir, les Tournaisiens sont là!"
J'peux m'endormir, les Tournaisiens sont là!"
J'peux m'endormir, les Tournaisiens sont là!"
Tralala la la la la lala lala
La lalalalala !

4.

Dix-huit chint trinte éclate, et la Belgique
Tout d'ein seul beond à Bruxell's a volé,
A pied, à qu'veau, heomm's posés et pratiques
Autour du Parc, nos gins veont s'imbusquer.
Les Brabancheons, in orwettiant leux faches
Ont demandé :"Quoi qu'ch'est qu'ces gaillards-là ?"
Quand i-eont su d'quoi, i-eont dit "
Nous seomm's à plache,
Nous seomm's sauvés, les Tournaisiens sont là!"
Nous seomm's sauvés, les Tournaisiens sont là!"
Nous seomm's sauvés, les Tournaisiens sont là!"
Tralala la la la la lala lala
La lalalalala !

5.

Nos combattants, ch'éteot de l'beonn' seminche
Et d'pus c'temps-là on les a vus pousser
Dins les Bieaux-Arts, dins l'Armée, les scieinches,
T'iest-c'qui a l’pompeon ?
Ch'est nous eaut's sins s'vanter
Et quand l's Inglés i-eont fet aller leu blaque,
Su nos soldats, t'iest-c'qui les rimbarra ?
Ch'éteot Renard qui leu livreot 1'toubaque,
I-eont dit :"Motus ! Les Tournaisiens sont là!"
I-eont dit :"Motus ! Les Tournaisiens sont là!"
I-eont dit :"Motus ! Les Tournaisiens sont là!"
Tralala la la la la lala lala
La lalalalala !

6.

Et si pus tard, i feaudreot qu'on r'quéminche,
Aux greos, aux p'tits, ein Belg' sareot prouver
Qu'i n'suffit pos de dir' -"Tès-ta, j'te minche!"
Néon! Avant cha, i feaudreot nous tuer.
Et quand no Roi, au momint du touillache
dira :"M'zinfant, l'ennemi est là-bas !"
Nous s'écri'reons : "A nous, Tournai, courache
On sintira qu'les Tournaisiens sont là!
On sintira qu'les Tournaisiens sont là,
On sintira qu'les Tournaisiens sont là
Tralalalala lala lalalala
La lalalalala lalalalalala la  la!